Hoxe día 29 e mañá día 30 terá lugar na Fundación Barrié a XXXVI Reunión
Anual da Sociedade Galega de Medicina Intensiva (SOGAMIUC), organizada polo
servizo de coidados intensivos do CHUAC, e onde mais de 120 intensivistas de
toda Galicia se reunirán baixo o lema “Galicia Intensiva: desafíos e
innovación”.
Ao longo dos 2 días que dura a reunión, debateranse as últimas novidades no
ámbito do paciente crítico. Con esta filosofía de abordar novos retos
preténdese actualizar o coñecemento científico máis recente en temas de
especial relevancia na atención ao tipo de paciente que se atende nestas
unidades (patoloxía infecciosa, paciente crítico que precisa osixenación por
membrana extracorpórea, visión integral do enfermo traumático, así como
patoloxías emerxentes nestas unidades como o paciente oncohematolóxico, entre
outros).
Os temas que se discutirán marcarán o futuro da medicina intensiva como o
papel da intelixencia artificial e novas tecnoloxías nas UCIs. Aspectos que se
abordarán desde un punto de vista multiprofesional con ampla experiencia no seu
campo e desde unha perspectiva humana e cunha visión de UCI sustentable.
A nova UCI do CHUAC
A distribución dos pacientes realízase en 3 unidades asignadas a patoloxías
específicas. Por unha banda, unha unidade cardíaca de 14 camas onde ingresan os
transplantados e postoperados cardíacos, pacientes con necesidade de soporte
extracorpóreo ou dispositivos de asistencia cardíaca avanzada e shock
cardioxénico. Por outra banda, dúas unidades de 14 camas cada unha onde se
ingresan divididos por áreas os pacientes neurocríticos, politraumatizados,
respiratorio sen/con necesidade de soporte avanzado, pacientes en shock
séptico, con lesión medular aguda, oncohematolóxicos e hepatópatas, traballando
de forma estreita e multidisciplinar coas especialidades de referencia. Por
último unha unidade con 3 camas asignadas a pacientes queimados críticos.
Ao longo do ano 2023 o número de ingresos realizados polos profesionais da
Unidade de Coidados Intensivos do CHUAC ascendeu a 1.863. E nos últimos tres
meses, coincidindo coa apertura da nova UCI, o número de ingresos realizados
acada os 538.
A apertura destas novas unidades, en febreiro do 2024, permitiu continuar
con proxectos xa iniciados, interdisciplinares e transversais con outros
servizos, así como o exporse novos retos en relación á sustentabilidade.