​

Nun acto celebrado no Edificio Administrativo de San Lázaro, no que estivo acompañado polo xerente do Sergas, José Ramón Parada, e polo xerente da Axencia Galega de Coñecemento en Saúde (ACIS), Antonio Fernández-Campa, Gómez Caamaño destacou o papel fundamental destes investigadores para manter o alto nivel de calidade asistencial no sistema público de saúde. 

O conselleiro trasladou as felicitacións aos novos investigadores, que foron seleccionados en distintos programas de investigación moi competitivos e elixidos entre excelentes expedientes. Isto, asegurou, reflicte “que estamos diante dun conxunto de investigadores con talento e potencial”.

Lembrou que para un servizo de saúde público como o galego é imprescindible manter un alto nivel de investigación polo que, contar con estes novos profesionais, que orientan a súa actividade cara ao campo da investigación será esencial para poder manter os altos niveis de calidade asistencial.

Na súa intervención, Gómez Caamaño trasladou a máxima vontade de colaboración e apoio da Xunta ao traballo destes investigadores, con medidas que permitan desenvolver a súa actividade nas mellores condicións. 

A tal efecto, lembrou que Galicia conta con tres institutos públicos de investigación sanitaria que, aproveitando as sinerxías entre os complexos hospitalarios e as universidades, impulsan, promoven e fomentan a investigación de excelencia e obteñen magníficos resultados que derivan en grandes éxitos en saúde.

O titular da carteira sanitaria lembrou que a benvida a este grupo excepcional de investigadores coincide co Día Mundial sen Tabaco, xornada na que se promoven actividades de loita contra o tabaquismo e para reivindicar o dereito á saúde e a unha vida sa, un ámbito no que, dixo, tamén cómpre continuar a potenciar a investigación.

Foro de encontro

A xornada cos novos investigadores celebrada hoxe ten como obxectivo fundamental establecer un foro de encontro para estes novos profesionais, así como potenciar a súa visibilidade e servir de estímulo para a súa actividade investigadora.

Trátase dun total de 33 novos profesionais que se incorporan ao Servizo Galego de Saúde no marco dos Programas de Axudas de Impulso á Investigación, cuxo obxectivo é a atracción de talento coa fin de favorecer a captación e formación de capital humano investigador e a súa mobilidade, así como promover a calidade e competitividade deste persoal.

O departamento sanitario galego conta cun total de 187 investigadores que se foron incorporando ao longo dos últimos anos. Para o Servizo Galego de Saúde todos eles non só supoñen unha fonte de inxección en captación de talento senón, tamén, de fortalecemento das liñas de investigación e de gran proxección nas que se incorporan.

No acto desta mañá tamén participaron tres investigadores cunha dilatada traxectoria, José Alberto Fernández Villar, do Instituto de Investigación Sanitaria Galicia Sur; María José López Armada, do Instituto de Investigación Biomédica da Coruña; e Clotilde Costa Nogueira, do Instituto de Investigación Sanitaria de Santiago de Compostela, que trasladaron a experiencia profesional da súa traxectoria pola carreira científica.