​

No acto de entrega de premios, o conselleiro estivo acompañado pola directora xeral de Ordenación e Innovación Educativa, Judith Fernández; pola directora xeral de Saúde Pública, Carmen Durán; pola directora xeral de Xuventude, Lara Meneses e, como patrocinadores do programa, representantes do Concello de Cerdeda e da empresa Monbus. 

Na XX edición do programa que desenvolven os departamentos autonómicos de Sanidade e Educación foron galardoados o alumnado de 2ºC do IES Agra de Raíces (Cee), gañador na categoría de Clases sen fume; 1ºA do CPR Sagrado Corazón-Celanova, na categoría de slogan; 1ºD do IES Breamo (Pontedeume), co 1º premio de actividade creativa; e con accésits: 2ºA do CPR Barreiro (Vigo); 1ºA do IES Monte Castelo (Burela); 1ºA do IES Politécnico (Vigo); 1ºB do IES Perdouro (Burela); 1ºA do CPR Galaxia (Ribeira) e 1ºB do IES Breamo. 

Na súa intervención, o conselleiro explicou que o programa ‘Clases sen fume’ vai dirixido á mocidade porque eles son os máis expostos a mensaxes que buscan atraer á xente nova cara a outras formas de consumo de nicotina máis atractivas, en cores e sabores, pero igual de perigosas para a saúde, como son os vapeadores. 

Nesta liña, Galicia está a tramitar a Lei de protección da saúde das persoas menores e prevención de condutas aditivas, que será pioneira en España ao equiparar os cigarros electrónicos ao tabaco convencional. Desta forma, búscase trasladar á poboación que os vapeadores están lonxe de ser inofensivos para a saúde. 

Para concienciar sobre os riscos do tabaco, que causa 8 millóns de mortes ao ano no mundo, a Xunta puxo en marcha o programa ‘Clases sen fume’ en 2002 coa participación de máis de 86.000 alumnos e alumnas de 1º e 2º da ESO.

O conselleiro rematou a súa intervención trasladando os parabéns aos 45 centros educativos e ás máis de 100 aulas participantes nesta edición do programa e agradecemento a implicación dos profesores, organizadores e patrocinadores.