Unha ducia de servizos
asistenciais do distrito sanitario do Salnés asinaron esta mañá un
compromiso de xestión medio ambiental, que supón a implantación e
o cumprimento dun novo protocolo chamado Servizo Verde. Esta
iniciativa pretende promover dentro da Área Sanitaria de Pontevedra
e O Salnés unha cultura da sustentabilidade na organización e da
participación dos profesionais, con especial atención aos servizos
asistenciais.
En
coincidencia coa celebración hoxe, 5 de xuño, do Día
Mundial do Medio Ambiente, o
salón de actos do Hospital Público do Salnés acolleu a firma deste
procedemento por parte dos responsables dos seguintes servizos e
unidades: Análises Cínicas, Anestesioloxía e Reanimación,
Cirurxía Xeral e Dixestiva, Dermatoloxía, Dixestivo,
Hospitalización a
Domicilio (HADO), Medicina Interna, Medicina Preventiva,
Otorrinolaringoloxía, Pediatría, Traumatoloxía, Urxencias e
Xinecoloxía.
Representación
da directiva da Área Sanitaria
Así
mesmo, en representación da directiva da Área Sanitaria estiveron
presentes neste acto o xerente, o doutor José Flores Arias; a
directora do distrito do Salnés, a doutora Encarnación Lucas
Bermejo; o director de Recursos Económicos, Vicente García
Fernández; e o subdirector de Calidade, Humanización e Atención á
Cidadanía, o doutor Jorge García-Borregón Millán.
Tamén
asistiron os autores do protocolo Servizo Verde:
a xefa do Servizo de Hostalería, Susana Abalo; o xefe de Sección da
Unidade de Calidade, Modesto Martínez Pillado, e o enxeñeiro
técnico industrial Diego Outón, da citada Unidade de Calidade.
Cara
a implantación da ISO 14001 no Salnés
A
directora do distrito do Salnés, Encarnación Lucas, é a impulsora
deste compromiso de mellora medio ambiental no centro asistencial de
Ande-Rubiáns, o cal pretende ser o inicio do camiño cara a
implantación da acreditación ISO 14001:2015 de Xestión Ambiental
no hospital arousán. Neste sentido, lembrar que os outros dous
hospitais da Área Sanitaria -Provincial e Montecelo-, contan xa con
esa certificación dende o ano 2009 tanto na actividade asistencial
como na non asistencial.
Metodoloxía
para identificar aspectos ambientais
O
protocolo Servizo Verde é
unha iniciativa da Unidade de Calidade da Área Sanitaria de
Pontevedra e O Salnés para facer partícipes de xeito voluntario aos
distintos servizos no Sistema de Xestión Integrado de Calidade e
Ambiental (SICA), que aporta unha metodoloxía para identificar
aspectos ambientais que poden provocar cambios na contorna. E mesmo
se os servizos están fóra do alcance do SICA, se promoverán
accións de xestión ambiental.
Baseado
nun sistema de niveis de cumprimento e a dotación dun logro
alcanzado, o Servizo Verde
avaliará accións como a segregación das distintas clases de
residuos -papel, cartón e pilas; fluorescentes, tóner ou similares;
ou medicamentos de refugallo ou caducados-, e a redución de consumos
de enerxía eléctrica, combustible e auga.
Entre
os obxectivos do procedemento cómpre salientar minimizar os riscos
para os profesionais derivados do tratamento de residuos e o
almacenamento de produtos perigosos, mellorar a seguridade dos
pacientes evitando potenciais efectos adversos no manexo de
sustancias perigosas no servizo, ou mellorar a saúde pública en
xeral ao contribuír o Servizo Verde ao
non prexudicar o medio ambiente onde vive a cidadanía que acude ao
servizo.