Unha das maiores preocupacións do Servizo Galego de Saúde é mellorar a
asistencia sanitaria á poboación, logrando niveis elevados de calidade e
seguridade para o paciente. Dentro desta política, a Unidade de Coidados
Críticos Cirúrxicos-Reanimación do CHUAC acaba de obter a certificación AENOR
que apoia o sistema de xestión da calidade, conforme ás esixencias normativas
internacionais como a UNE-EN ISO 9001:2015.
A acreditación certifica que o enfoque dos coidados oriéntase aos
procesos e persegue optimizar o desempeño global, a través dunha mellora
continua na calidade da atención e na seguridade proporcionada aos pacientes e
a súa contorna. Isto lógrase ao satisfacer as súas necesidades e expectativas,
mediante un servizo accesible e humanizado, no que de forma cíclica e
continuada os procesos planifícanse e documéntanse, lévanse a cabo, avalíanse e
modifícanse, de acordo aos resultados obtidos nos diferentes indicadores medidos.
Establécense obxectivos con prazos específicos de execución, identifícanse
oportunidades de mellora, e se detectan e analizan, dentro de cada proceso, os
riscos existentes, para neutralizalos ou minimizalos. Ademais, o sistema está
sometido a auditorías internas periódicas sendo certificado por unha empresa
auditora externa (AENOR), que verifica anualmente o seu correcto funcionamento.
O alcance do sistema de xestión abarca os procesos prestados aos
pacientes Críticos Cirúrxicos do Hospital Universitario da Coruña: desde o seu
ingreso e estabilización, pasando polo seu seguimento, ata a alta do paciente
da Unidade.
A implantación do Sistema, coordinada co Servizo de Calidade do Hospital,
supón un cambio de paradigma na atención ao paciente Crítico Cirúrxico, que
sempre foi o centro de todos os coidados que proporcionan os equipos de
profesionais que traballan no día a día da Unidade (Anestesiólogos/as,
Enfermeiras/os, Técnicos/as de Coidados de Enfermería, Fisioterapeutas,
Celadores/as e Persoal de Limpeza), co soporte que proporcionan outros Servizos
do Centro (Unidades de Hospitalización, Radioloxía, Laboratorios, Farmacia,
empresas de loxística, servizos e mantemento).
A
Unidade é a segunda destas características que se certifica na Comunidade
Autónoma, e a primeira en incluír coidados críticos de pacientes transplantados
e cirúrxicos complexos. Os máis de 1.700 ingresos anuais, ratifican o compromiso
e o liderado na atención e o coidado ao paciente cirúrxico. Por último, a
certificación supuxo unha panca de cambio na mellora do traballo en equipo
dentro da Unidade, aliñando os obxectivos dos diferentes profesionais que a
forman e redundando nunha mellora na satisfacción co desempeño realizado.