O titular da carteira sanitaria do Executivo galego participou, xunto co xerente da área sanitaria de Vigo, Javier Puente, no acto inaugural do 15º Simposio Nacional de Cirurxía Maior Ambulatoria.

Gómez Caamaño destacou que este tipo de cirurxía permite tratar a gran cantidade de pacientes de xeito seguro e efectivo, e cunha maior satisfacción para os doentes e familiares.

Para o conselleiro, dada a calidade, seguridade e eficiencia, a cirurxía maior ambulatoria é unha modalidade que se debe potenciar e que creceu exponencialmente nos últimos dez anos. Avogou por continuar con esta liña de traballo, tanto pola comodidade do paciente, que prefire estar na súa casa; como pola súa seguridade, posto que a maior estadías hospitalarias hai maior risco de infeccións; e, ademais, pola liberación de recursos ao non requirir ingreso.

Na súa intervención, Gómez Caamaño  incidiu en que, para garantir a sostibilidade do Sistema Nacional de Saúde, é necesario desenvolver todas aquelas medidas que garantan o uso máis racional e eficiente dos recursos. A obriga como administración, incidiu o conselleiro, é protexer, preservar e optimizar o sistema de saúde e para iso precísase a colaboración de todos.