XUNTA E CONCELLO DA BAÑA MELLORARÁN OS PECHAMENTOS E A EFICIENCIA ENERXÉTICA DO CENTRO DE SAÚDE DA LOCALIDADE
EnviarImprimirPDF
FacebookTwitterMeneame
22 06 2022

O conselleiro de Sanidade, Julio García Comesaña; e o alcalde da Baña, Andrés García Cardeso; asinaron está mañá un convenio no que se establecen as bases para o financiamento de varias melloras no centro de saúde da localidade, entre as que destacan a substitución das luminarias existentes, de tipo incandescente ou fluorescente, por novas luminarias LED, máis eficientes e con menor consumo e a limpeza da fachada exterior mediante equipo de lanza de auga e a revisión da cuberta. Esta reforma ten por obxectivo reducir o consumo eléctrico no edificio; reducindo tamén a contaminación ambiental asociada á xeración de electricidade.
 
No acto estiveron acompañados pola xerente da Área Sanitaria de Santiago e Barbanza, Eloína Núñez.
 
Este acordo tramitouse tomando como base unha memoria arquitectónica achegada polo alcalde da Baña o pasado novembro, despois de manter unha reunión co conselleiro na que lle garantiu o apoio para abordar esta reforma.
 
Segundo a devandita memoria, as obras a executar terán un importe total de 47.980 euros, correspondendo á substitución de luminarias existentes por unha tipo led, á limpeza de fachada exterior e a revisión da cuberta.
 
O conselleiro de Sanidade agradeceu a boa disposición do alcalde para poder asinar este convenio co tempo suficiente para que se poida licitar a obra e executarse en prazo. Deste xeito, o persoal e os pacientes do centro de saúde da Baña contarán cun centro de saúde mellor e máis confortable.
 
Ademais, lembrou que non é a primeira mellora experimentada polo centro de saúde da Baña nos últimos anos pois, froito do investimento de 8 millóns de euros en equipamento, derivado do Plan Galego de Atención Primaria 2019-2021, este centro recibiu un electrocardiógrafo e un espirómetro por un importe total de 5.929 euros.
 
Colaboración da Xunta cos centros de saúde de titularidade municipal
A sinatura deste convenio significa dar un paso máis na renovación das infraestruturas de atención primaria existentes na nosa comunidade. Dende o ano 2009, a Xunta de Galicia construíu ou reformou un total de 100 centros de saúde, o que supuxo actuar sobre mais de 75.000 metros cadrados. A eles hai que engadir as 5 obras que están arestora en marcha. En total, a Administración autonómica investiu, nestes 12 anos, máis de 120 millóns de euros en infraestruturas sanitarias de atención primaria.
 
Un terzo destas actuacións téñense levado a cabo en centros de saúde de titularidade municipal, nos que a Xunta de Galicia achega os fondos para cofinanciar a obra. Só no ano pasado, a Xunta achegou preto de 700.000 euros para 16 convenios de reforma de centros de saúde de titularidade municipal coma este, asumindo os concellos a outra parte do gasto. En particular, na provincia da Coruña financiáronse actuacións nos centros de saúde dos concellos Bergondo, Monfero, Pobra do Caramiñal ou Valdoviño.
 
A Xunta continúa así a colaborar cos concellos que manteñen centros de saúde de titularidade municipal.  Desde o 2017, a distribución que a Xunta fai do Fondo Adicional do Fondo de Cooperación Local inclúe a previsión de compensar os custos de mantemento dos centros de saúde de titularidade municipal.
 
No orzamento para o ano 2022 a Xunta reforzou unha vez máis o seu apoio a estas entidades locais e incrementou ata os 2,4 millóns de euros a partida –un 14%-. Con isto, a Xunta de Galicia ten destinado desde 2007 cerca de 11 millóns de euros a financiar os gastos de funcionamento de 156 centros de saúde de titularidade municipal, cantidade que en concreto para a provincia da Coruña ascendeu a 3,7 millóns de euros. Concretamente, o Concello da Baña recibe 19.911 euros anuais para financiar o mantemento do seu centro de saúde.
 
En definitiva, a Xunta non só colabora cos concellos no mantemento habitual destes centros senón que tamén colabora cofinanciando as actuacións cando, como neste caso, hai que facer reformas importantes. 

 

EnviarImprimirPDF
FacebookTwitterMeneame
Xunta de Galicia © Xunta de Galicia. Información mantenida y publicada en internet por la Consellería de Sanidad - Servicio Gallego de Salud