Trátase de Elena Pérez Martínez, palentina residente en Valladolid que recibiu os ultrasóns para tratar o tremor esencial da extremidade superior dereita onte ás 14.30h. Xa notou a melloría ao momento de ser sometida á intervención realizada por un equipo multidisciplinar formado por neurólogos, neurocirurxiáns e neurorradiólogos e foi dada de alta o mesmo día.

Elena, médico de familia xubilada, notou o primeiro tremor hai 6 anos, cando tiña 64, e no último ano a súa calidade de vida virase moi mermada. Hoxe comparecía ante os medios para “agradecer poder empezar a ter unha vida normal, porque ata hoxe non podía comer soa, nin beber, non podía agarrar absolutamente anda”.

Na rolda de prensa realizada esta mañá no Clínico, tan só 21 horas despois de realizarse a intervención, acompañaron á paciente a xerente do SERGAS, Estrella López-Pardo, a xerente da área sanitaria de Santiago e Barbanza, Eloína Núñez, e membros do equipo que levan a cabo a técnica HIFU (o neurólogo Ángel Sesar, o neurocirurxián Eduardo Arán e o neurorradiólogo Miguel Blanco, entre outros).

A xerente do SERGAS, Estrella López-Pardo destacou o éxito desta técnica “froito da participación dun equipo excepcional tanto no eido profesional como no humano”, a quen lle agradeceu ser quen de obter “tan bos resultados nunha intervención tan pouco invasiva”. Pola súa banda Eloína Núñez subliñou a importancia de contar con esta sofisticada aparataxe pero tamén cos mellores profesionais, porque a “combinación entre o coñecemento e a tecnoloxía é a que ofrece tan bos resultados como os que estamos vendo”.

Ata o momento beneficiáronse 100 pacientes (o 93% con tremor esencial e 7% párkinson) e dos que 23 son de fóra de Galicia (de Asturias, Euskadi, Burgos, Valladolid, Zamora, León, Andalucía, Madrid e Mallorca).

O doutor Sesar indicou que o “5x1.000 da poboación sofre tremor esencial, pero só un 15% buscan tratamento e deles unha pequena porcentaxe non responde as terapias convencionais” e con respecto á técnica HIFU incidiu en que “a rapidez coa que actúa nos sorprende a todos: o paciente chega con tremor e saen sen el”.

O Sergas foi o primeiro sistema público de saúde de España, e un dos primeiros de Europa, en contar coa tecnoloxía máis avanzada no tratamento contra o Párkinson e o tremor esencial ao adquirir este equipo de ultrasóns de frecuencia focalizada, emprazado no Hospital Clínico de Santiago.

Tremor esencial

O tremor esencial e o párkinson son dúas enfermidades moi prevalentes na poboación, especialmente na de máis idade, afectando a un total duns 4.000 galegos. Aproximadamente a metade dos doentes teñen efectos secundarios e/ou non responden ao tratamento. O 45 % destes doentes tiñan como alternativa, ata o de agora, a cirurxía de estimulación cerebral profunda (ECP), na que o Hospital Clínico é centro de referencia estatal desde hai 20 anos, polo que trata a doentes de outras comunidades autónomas.

Son dúas patoloxías moi discapacitantes. Ademais dos tremores, especialmente nas extremidades superiores, tamén se ten identificado unha disfunción cognitiva. Os doentes con TE tamén poden presentar tremor na voz e tremor nas extremidades maniféstase especialmente coa acción, por exemplo ao escribir, comer o verter líquidos, o que provoca que os doentes con tremor máis intenso vexan moi limitada a súa actividade diaria habitual.

Saúdos,