Santiago de Compostela, 13 de febreiro de 2023.-  O Servizo de Atención Primaria de Muros e Carnota incorpórase á rede de centros que desenvolven o Plan Local de Saúde. Esta mañá a xerente da área sanitaria de Santiago e Barbanza, Eloína Núñez, o director de atención primaria compostelá, Felipe Calle e a alcaldesa de Muros, Inés Monteagudo, participaron na presentación do plan que tivo lugar no antigo Centro de Saúde de Muros a cargo de Domingo Fabeiro, xefe do servizo. O alcalde de Carnota, Juan Manuel Saborido, non puido asistir por mor do incendio que se rexistrou no concello na noite pasada. Ä presentación tamén acudiron representantes de asociacións deportivas locais,  persoas con discapacidade e traballadores sociais dos concellos.

A xerente Eloína Núñez, “destacou a importancia do desenvolvemento destes plans para ir máis alá na atención sanitaria e involucrarnos de cheo na prevención da saúde”. Pola súa parte a alcaldesa de Muros, Inés Monteagudo, pediu “a colaboración de todos os implicados para poder levar a cabo este plan”.

Trátase do quinto centro de saúde da área en implantalo. Arestora xa está en marcha en Santa Comba, Teo, A Estrada e  Silleda e continuarase con Ordes e Valga.

Os plans locais de saúde son proxectos estratéxicos e de xestión que recollen a radiografías da saúde da poboación de referencia e a planificación de toda acción e medidas concretas que poidan mellorar a calidade de vida do cidadán.  Están elaborados polos propios profesionais de cada centro, que son os que máis e mellor coñecen as demandas de atención de pacientes e dos seus servizos de atención primaria. Un traballo de gran valor, xa que ser este nivel asistencial o máis achegado ao cidadán, permite coñecer mellor as súas demandas e adaptar o servizo ás súas necesidades sanitarias.

Todos os plans comparten en común uns principios básicos que afondan nunha atención integral e integradora, centrada na persoa; que potencia a visión familiar e comunitaria, que garante a accesibilidade, continuidade e coordinación nos coidados, que estea baseada na promoción, prevención e proactividade, que permita novas asignacións entre os profesionais e que asegure un liderado compartido.

Para lograr as accións relacionadas cos obxectivos do Plan Local de Saúde facilitarase a formación, docencia e investigación dos profesionais do Servizo de Atención Primaria.

Dende a xerencia da Área Sanitaria adecuaranse os recursos humanos e materiais destes centros para mellorar o nivel de saúde da cidadanía e a ampliación da carteira de servizos, creando  unha unidade específica  para a promoción da saúde compartira entre os Servizo de Atención Primaria da Área (nutricionista, psicólogo e técnico de ciencias da saúde e o deporte) supeditada á transferencia do proxecto de comisión europea de boas prácticas clínica: Health Promotion Centres.

O fin é mellorar a saúde da poboación e a eficiencia dos servizos concedéndolle máis capacidade de autoxestión aos centros.

Saúdos​