Santiago, 21 de
outubro do 2023.- A Área Sanitaria
de Santiago de Compostela e Barbanza realizou con éxito a primeira
intervención con Mako, o robot de
última xeración para a cirurxía ortopédica, un equipo para o que o executivo
galego investiu 1.440.000€.
A operación, liderada polo Servizo de
Traumatoloxía e Cirurxía Ortopédica, tivo lugar o xoves 19, nos quirófanos do Hospital de
Conxo, e consistiu na colocación dunha prótese de xeonllo a unha
muller de 80 anos, cunha duración de pouco más dunha hora. A evolución da
paciente é favorable e proximamente será dada de alta.
Esta avanzada tecnoloxía robótica para cirurxía ortopédica e
traumatolóxica permitiu realizar a intervención con maior precisión e seguridade,
así como reducir tempos no quirófano e na recuperación da funcionalidade.
Estímase que coa incorporación desta aparataxe se poidan realizar entre o
35-40% das artroplastias, fundamentalmente de xeonllo e cadeira.
Os sistemas robóticos
tamén teñen a finalidade de axudar a mellorar a destreza e capacidade
cirúrxica, permitíndolle ao cirurxián realizar manipulacións que, sen este
sistema, serían imposibles nalgúns casos, proporcionando unha considerable
mellora na seguridade das intervencións cirúrxicas.
O director xeral de
Asistencia Sanitaria do Sergas, Jorge Aboal, destacou tras a realización
da intervención en Santiago que “é un
día importante para a sanidade galega. Unha vez máis a Xunta de Galicia
aposta pola alta tecnoloxía para que os galegos poidan ter á súa disposición
todo este material tecnolóxico e mellorar a calidade asistencial e a
seguridade”. O doutor Aboal asegura
que dende o goberno galego continúan
apostando pola robotización dos quirófanos para ofrecerlle o mellor aos
pacientes e aos profesionais.
Pola súa banda, a
xerente da Área Sanitaria de Santiago e Barbanza, Eloína Núñez , tras agradecer a dedicación dos profesionais que
participaron na intervención, recalcou esa “aposta pola innovación
tecnolóxica aplicada aos nosos pacientes” tanto da xerencia como da
consellería de sanidade “con investimentos en robótica para a mellora da
saúde e da medicina en Galicia”.
O xefe do servizo de
Traumatoloxía da área sanitaria compostelá, José Ramón Caeiro,
encargado de realizar
a intervención xunto ao doutor Enrique Fernández, responsable da unidade de
xeonllo, o traumatólogo Fernando Sines, e a anestesista Sabela del Río, mostrouse
satisfeito tras a operación indicando que “as sensacións son boas, o equipo
funcionou como unha máquina perfectamente engraxada polo que teño que
agradecerlle a todos o seu compromiso, formación e profesionalidade”.
Incidiu que este novo
robot ”aporta seguridade da reprodución da biomecánica, neste caso do
xeonllo, cun aumento de precisión cirúrxica, permitindo que teñan unha expectativa
de supervivencia no tempo moito maior e diminuíndo os riscos inherentes as
abordaxes máis amplas”. Conclúe que “a eficacia e eficiencia destes brazos
robóticos está demostrada”.
“A cirurxía robótica
no campo da ortopedia o que permite é a mellora da precisión, porporcionando un plus de seguridade para o
paciente, pero o que máis nos va a aportar será esa precisión
intraoperatoria, tratando de reducir as principais complicacións desa intervención”
afirma Enrique Fernández Peña, responsable da unidade de xeonllo do servizo
de traumatoloxía.
|