O Hotel Attica21 acollerá o vindeiro sábado dia
11 de novembro o “Diabetes Evolution 2023”, un evento dedicado exclusivamente
ao tratamento e os avances da diabetes, principalmente a diabetes infantil e
xuvenil, patoloxía que padecen en Galicia 5 de cada 1.000 nenos.
O 14% da poboación española padece diabetes, o que supón
case 6 millóns de persoas. E tanto a incidencia da diabetes tipo 2, a máis
prevalente, cun 90-95% de casos, como da diabetes tipo 1, non deixa de crecer.
En ambos casos, o control glucémico é determinante para mellorar a calidade de
vida das persoas que a padecen. Para conseguilo, “nos últimos anos está a
producirse unha revolución en canto a innovacións terapéuticas e dispositivos
tecnolóxicos que permiten que as persoas con diabetes leven unha vida normal.
Non hai que esquecer que é unha enfermidade crónica e non é fácil convivir con
ela”, sinala a doutora Teresa Martínez, xefa do Servizo de Endocrinoloxía do
Complexo Hospitalario Universitario da Coruña (CHUAC) e coordinadora do evento
Diabetes Evolution.
Un encontro que, organizado polo Servizo Galego de Saúde
e a Fundación de Endocrinoloxía e Nutrición Galega, volve reunir a profesionais
sanitarios e persoas con diabetes de Galicia para analizar e reflexionar sobre
a situación actual, os avances e os retos na abordaxe da diabetes. Todo co
obxectivo de ter máis coñecemento e conseguir máis concienciación sobre este
trastorno na Comunidade.
“Conseguir reducir o
impacto da enfermidade, a intervención en diabetes, ademais de asegurar unha
adecuada asistencia sanitaria, require de accións de prevención e promoción da
saúde sobre os factores determinantes da enfermidade e unha adecuada educación
nos pacientes para minimizar as súas repercusións cando xa está presente”,
destaca a especialista do CHUAC.
Presente
e futuro
Considerada unha pandemia pola Organización Mundial da
Saúde (OMS), se non se controla de forma adecuada a diabetes pode producir
complicacións asociadas moi graves. Enfermidades cardiovasculares, trastornos
renais ou retinopatía diabética con perda de visión son algunhas das patoloxías
que fan máis dependentes ás persoas que as padecen.
Con todo, os relevantes avances científicos son
esperanzadores. “Novidades terapéuticas que cambian a vida das persoas”, afirma
a doutora Martínez. Esta explica que xa hai importantes achegas. “Por unha
banda, tratamentos máis fisiolóxicos, non dirixidos exclusivamente a reducir os
niveis de glucosa, senón a traballar en todo o que supón a diabetes, a
resistencia á insulina, a inflamación, etc. E, por outro, melloras a nivel
técnico dos dispositivos, ata o de agora máis utilizados en diabetes tipo 1,
pero que están a entrar de cheo na diabetes tipo 2”.
Entre estes dispositivos atópanse: os sensores de
glucosa, que miden de forma constante os niveis desta e avisan cunha alarma
cando se vai a chegar a un nivel perigoso, as bombas de insulina e os sistemas
integrados. “Estes últimos, que unen a bomba cun sensor, son a evolución cara
ao páncreas artificial. Con todo, hai que seguir investigando”, indica a
doutora Martínez.
Cambio
de hábitos
Esta doutora recoñece a dificultade para conseguir
cambiar o estilo de vida da persoa con diabetes. Respecto aos hábitos
nutricionais coincide en que “a nosa dieta mediterránea está a consolidarse
como o patrón de dieta que ofrece máis beneficios. Pero sempre establecendo
obxectivos individualizados”.
Sobre o exercicio físico, matizan que “o mesmo dependerá da idade, o nivel
de adestramento físico e a existencia doutras patoloxías. En xeral, recoméndase
realizar exercicio físico moderado durante 30
min polo menos 3-5 días á semana. Por exemplo, camiñar a diario”.