O curso será inaugurado por Luis Verde Remeseiro, xerente da Área sanitaria da Coruña e Cee, e polos doutores Ramón Antelo e Benedicto Novoa, xefe do Servizo de Cirurxía Ortopédica e Traumatoloxía e xefe da Unidade de Xeonllo de dito centro, respectivamente.

Os temas que se debaterán ao longo do curso dividiranse en catro mesas. Na xornada do xoves as discusións centraranse nas lesións e tratamentos dos ligamentos do xeonllo, tanto laterais como cruzados. Xa na xornada do venres os expertos debaterán a abordaxe e a revisión das próteses totais de xeonllo, onde destacará a mesa sobre as técnicas cirúrxicas robóticas na patoloxía de xeonllo.

A utilización do sistema de cirurxía robótica para a substitución de xeonllo e de cadeira demostrou ser a máis vantaxosa para o doente comparadas coas técnicas manuais, supoñendo unha maior exactitude e precisión á hora de planificar a posición e o tamaño do implante, ademais de supoñer menor sangrado durante a cirurxía, menor dor postoperatoria, menor tempo de recuperación e de estancia hospitalaria e unha diminución das complicacións.

A artroplastia total de xeonllo é, actualmente, un dos procesos cirúrxicos de máis alta prevalenza en Cirurxía Ortopédica e Traumatoloxía, demostrando ser altamente efectivo á hora de mellorar a dor e a calidade de vida dos doentes con patoloxía dexenerativa ou inflamatoria de dita articulación.

A patoloxía de xeonllo en cifras

O servizo de cirurxía ortopédica e traumatoloxía do CHUAC implanta ao redor de 600 próteses de xeonllo ao ano. A isto hai que engadir as cirurxías realizadas por fracaso ou desgaste da propia prótese, o que supón unhas 100 cirurxías anuais máis.

A incidencia das lesións meniscais agudas é de 61 por cada 100.000 habitantes, e un 33% destas están asociadas a roturas de ligamento cruzado anterior.