A XUNTA APROBA O DECRETO QUE REGULA O PROGRAMA DE DETECCIÓN PRECOZ DE 34 ENFERMIDADES XENÉTICAS, ENDÓCRINAS E METABÓLICAS EN PERÍODO NEONATAL
EnviarImprimirPDF
FacebookTwitterMeneame
23 11 2023

O Consello da Xunta, na súa xuntanza semanal, aprobou o Decreto polo que se regula o Programa galego para a detección precoz de enfermidades xenéticas, endócrinas e metabólicas en período neonatal, que ascenden a 34, e polo que se crea o comité asesor do programa.

Desta forma, Galicia mantén a máis ampla carteira de cribado neonatal de todo o Sistema nacional de saúde, que unicamente marca sete enfermidades na carteira básica. Con ela, desde o ano 2000 ata o peche de decembro de 2022, participaron nos cribados 449.109 neonatos, que representan unha taxa do 99 %, e foron diagnosticadas 647 enfermidades (212 hipotiroidismo conxénito, 40 fenilcetonurias, 52 fibroses císticas e 343 metabólicas). 

Como ampliación da carteira de servizos galega, no mes de maio deste ano incorporouse a detección precoz da atrofia medular espiñal (AME), inmunodeficiencia combinada grave (IDCG) e hiperplasia suprarrenal conxénita (HSC). Desde ese momento, dous bebés foron diagnosticados de AME e comezaron o tratamento, o que pode supoñer un grande avance para a súa calidade de vida.

Para valorar o funcionamento deste programa de cribado e as posibles modificacións que se consideren oportunas con base na evidencia científica, o Consello da Xunta tamén aprobou a creación dun comité asesor formado pola titular da Dirección Xeral de Saúde Pública, persoal do programa de cribados poboacionais, representación da Dirección Xeral de Asistencia Sanitaria do Sergas, representación da unidade de avaliación de tecnoloxías sanitarias en Galicia, persoal facultativo especialista en pediatría das unidades de maternidade de centros do Sergas, unha persoa da área de coñecemento de Pediatría da Universidade de Santiago de Compostela e persoal facultativo do laboratorio de metabolopatías do Complexo Hospitalario Universitario de Santiago de Compostela (CHUS), laboratorio de referencia para a realización das probas deste cribado neonatal.

Así, este comité asesor será desde a entrada en vigor do novo decreto o encargado de propoñer, baseándose nos datos epidemiolóxicos e na evidencia científica dispoñible, a incorporación de novas patoloxías ao programa ou a eliminación dalgunha das actuais. Como mínimo, o decreto aprobado hoxe polo Consello da Xunta prevé que, no prazo de cinco anos desde a súa entrada en vigor, o comité asesor se pronuncie sobre a pertinencia de manter no programa de cribado neonatal as 34 enfermidades que o conforman actualmente.​

EnviarImprimirPDF
FacebookTwitterMeneame
Xunta de Galicia
© Xunta de Galicia. Información mantenida y publicada en internet por la Consellería de Sanidad - Servicio Gallego de Salud