A UNIDADE DE HIPERTENSIÓN DO CHUF PARTICIPOU NO ENSAIO CLÍNICO INTERNACIONAL FIDELIO SOBRE DANO RENAL EN PACIENTES DIABÉTICOS
EnviarImprimirPDF
FacebookTwitterMeneame
09 11 2020

​A Unidade de Hipertensión do Complexo Hospitalario Universitario de Ferrol vén de participar no ensaio clínico internacional, Fidelio, que  investiga un novo tratamento para pacientes con Diabetes Tipo 2 (DM2) con dano renal, que son o 35% dos mesmos. Durante o verán, informábase de que se cumpriran os obxectivos primario e secundario deste ensaio que durou cinco anos, e neste mes de outubro publicábanse os datos definitivos, no New England Journal of Medicine. O obxectivo fundamental deste ensaio era enlentecer a progresión da enfermidade renal e diminuír o número de pacientes que entran en diálise ou falecen por causa renal. Como obxectivo secundario, está tamén reducir os eventos cardiovasculares que poden ir asociados.

A diabetes tipo 2 cada vez é máis frecuente nunha poboación que vive máis anos, pero na que cada vez é máis elevado o índice de sedentarismo e a obesidade. Algúns estudos falan dun 14% de incidencia deste tipo de Diabetes xa en España, explica o coordinador do ensaio e responsable da Unidade de Hipertensión, o especialista en Medicina Interna, Francisco Martínez Debén.
 

O 35% destas persoas desenvolverán dano renal provocado e ese dano será progresivo. A diabetes, de feito, é a primeira causa de entrada en diálise. Hai fármacos que se teñen amosado efectivos para deter esa progresión; e ábrense liñas de investigación en busca de novos fármacos para deter ou enlentecer esa progresión. O ensaio Fidelio no que participa o Complexo Hospitalario Universitario de Ferrol é unha delas, e se investiga Finerenona, que xa ten pasado a Fase I e Fase II, e agora investígase na Fase III a súa eficacia e seguridade.
 

Neste intre, lembrar que a Unidade de Hipertensión do Complexo Hospitalario Universitario de Ferrol ten unha longa traxectoria na participación de ensaios clínicos a nivel internacional. De feito, esta Unidade participa en ensaios clínicos internacionais dende o ano 1991; e en estudos en Fase II ou III, fases nas que non é habitual que participe un hospital deste tamaño.
 
Participación de 38 pacientes da Área ferrolá
O ensaio Fidelio tivo unha duración de cinco anos e acabou o pasado marzo. Nel participaron un total de 3.171 pacientes de máis de 1.000 centros en todo o mundo, dos que 26 eran españois. O Complexo Hospitalario Universitario de Ferrol participaba con 38 pacientes da Área Sanitaria de Ferrol, situándose como segundo hospital do mundo en número de pacientes que achega para o estudo. “Isto é grazas ós pacientes”, subliña Martínez Debén, “e pacientes benefícianse dun novo fármaco porque outros teñen participado en estudos deste tipo”, remarca.
 
Un terzo desas persoas que teñen Hipertensión teñen Diabetes Tipo 2, co que o recrutamento destes pacientes xa ten esta primeira vía na propia Unidade, pero tamén colaboran -explica o responsable da Unidade de Hipertensión- os profesionais de Atención Primaria e os de Nefroloxía. Os requisitos para a participación neste ensaio de investigación era ter diabetes e enfermidade renal, e que estiveran a recibir xa tratamentos que ensaios previos amosaran eficaces. A estes pacientes ofrecéuselle a posibilidade de colaborar.
 

Fidelio é o que se denomina un estudo dobre cego, xa que de xeito aleatorio recibes a molécula ou placebo; nin pacientes nin investigadores saben quen toma o placebo e quen toma o fármaco. O perfil do paciente destes ensaio na Área Sanitaria ferrolá é semellante en número de homes e mulleres, e, na súa maior parte, maiores de 65 anos.
 
Martínez Debén reflexiona sobre como “a Covid ten amosado a importancia do ensaio clínico ó ver o necesario que é realizar unha vacina coa máxima premura”. E, tranquiliza, “o paciente sempre se beneficia dun ensaio clínico porque está totalmente monitorizado e seguido”. Este especialista remata resaltando novamente o valor fundamental dos e das pacientes: “aquí os pacientes soen ser receptivos e colaboradores, e iso é importante porque redunda no beneficio doutras persoas no futuro. Cada pastilla que un toma ten pasado unha serie de fases, e é posible grazas a persoas voluntarias que teñen participado nas distintas investigacións”.

 
SAÚDOS,
COMUNICACIÓN ÁREA SANITARIA DE FERROL.
EnviarImprimirPDF
FacebookTwitterMeneame
Xunta de Galicia
© Xunta de Galicia. Información mantida e publicada en internet pola Consellería de Sanidade - Servizo Galego de Saúde
Internet e ti | Contacte
rss