A UNIDADE DE LÍPIDOS DA ÁREA SANITARIA COMPOSTELÁ DESENVOLVE UN PROGRAMA PARA A DETECCIÓN PRECOZ DA HIPERCOLESTEROLEMIA FAMILIAR
EnviarImprimirPDF
FacebookTwitterMeneame
23 02 2022

Santiago de Compostela,  23 de febreiro de 2022.- A Unidade de Lípidos do Servizo de Endocrinoloxía da Área Sanitaria de Santiago de Compostela e Barbanza ven de iniciar un programa para a detección precoz da Hipercolesterolemia Familiar mediante a alerta automática a través do laboratorio central.

 

A Hipercolesterolemia Familiar é unha enfermidade hereditaria que afecta a unha de cada 300-500 persoas, que se transmite ao 50 % dos membros dunha familia, tanto homes como mulleres, e que manifesta os seus síntomas desde a infancia.

 
Estímase que na Área Sanitaria de Santiago de Compostela e Barbanza habería entre 1.800 e 2.250 persoas que padecen esta enfermidade, a maioría aínda sen identificar. Esta patoloxía asóciase ao risco de desenvolver enfermidade cardiovascular prematura e caracterízase por uns niveis de colesterol- LDL elevados, con risco de morte a idade temperá.
 
Por outra banda, sábese que ao redor dun 50 % dos homes e o 20 % das mulleres con hipercolesterolemia familiar sen tratamento presentarán un episodio coronario ao redor dos 50 anos. Por tanto, “o diagnóstico precoz e o tratamento adecuado son fundamentais para previr a enfermidade cardiovascular. De aí, o interese da posta en marcha do programa para a detección da Hipercolesterolemia Familiar principalmente desde os especialistas de Atención Primaria”, afirma Miguel Angel Martínez-Olmos, xefe do Servizo de Endocrinoloxía e Nutrición da área compostelá.
 
A Unidade de Lípidos da Área Sanitaria de Santiago de Compostela e Barbanza, composta por especialistas de Endocrinoloxía e Nutrición coordinados con especialistas de Atención Primaria, Análises Clínicas, Farmacia Hospitalaria e Medicina Xenómica, iniciou a súa andadura a finais do pasado ano.
 
O seu principal obxectivo é dar resposta a aqueles pacientes con niveis elevados de colesterol e/ou triglicéridos que presentan ademais unhas características que esixen un tratamento especializado, “estamos a falar –subliña o xefe do Servizo de Endocrinoloxía-  de doentes con patoloxía hereditaria, con mala resposta ao tratamento farmacolóxico habitual ou intolerancia aos tratamentos convencionais”.
 
É dicir, pacientes que compren cos criterios de derivación sinalados pola Sociedade Española de Ateroesclerose: persoas con hiperlipemias graves e perfís lipídicos anormalmente elevados; pacientes con necesidade de clasificación da dislipemia mediante diagnóstico metabólico-xenético, especialmente hipercolesterolemia familiar; pacientes con difícil control terapéutico (efectos secundarios graves, tratamento con máis de dous fármacos ou interaccións farmacolóxicas significativas), e enfermidade isquémica manifesta en menores de 55 anos sen outros factores de risco coñecidos.
 
“As dislipemias son un dos factores que achegan máis risco para os enfermos cardiovasculares e constitúen na actualidade enfermidades cuxo diagnóstico e manexo se poden optimizar”, aí radica a principal motivación para crear esta unidade, segundo engade o doutor Martínez-Olmos.
 
O Estudo de Nutrición e Risco Cardiovascular en España (ENRICA) pon de manifesto que, da poboación española que ten cifras elevadas de colesterol (preto do 50%) , só a metade son tratados e, destes, só un 53 % obteñen un control adecuado. Como consecuencia, hai unha importante porcentaxe da poboación na que se pode mellorar o correcto control da hipercolesterolemia como factor de risco.
 

 

Saúdos,

 

EnviarImprimirPDF
FacebookTwitterMeneame
Xunta de Galicia
© Xunta de Galicia. Información mantida e publicada en internet pola Consellería de Sanidade - Servizo Galego de Saúde
Internet e ti | Contacte
rss