O PROXECTO INNOVATRIAL DESTINADO AO DESENVOLVEMENTO DUNHA PLATAFORMA QUE INTEGRE A INVESTIGACIÓN CLÍNICA COA ACTIVIDADE ASISTENCIAL DO SISTEMA SANITARIO GALEGO TERÁ UN PRESUPOSTO DE 12 MILLÓNS DE EUROS
EnviarImprimirPDF
FacebookTwitterMeneame
04 06 2022

A Consellería de Sanidade vén de subscribir a modificación do convenio entre o Ministerio de Ciencia e Innovación e o Sergas, para o proxecto Innovatrial, iniciativa que ten como obxectivo o desenvolvemento dunha plataforma de integración da investigación clínica coa actividade asistencial que se realiza en Galicia. Isto supón, o incremento do orzamento previsto para a licitación, que pasa de 6 millóns de euros a 12,1 millóns, e que será financiado polos fondos Next Generation EU do Mecanismo de Recuperación, Transformación e Resiliencia. Tamén supón a ampliación do prazo de execución do proxecto ata decembro de 2025.

O Sergas e o Centro para o Desenvolvemento Tecnolóxico Industrial (CDTI), dependente do Ministerio de Ciencia e Innovación, asinaron unha addenda de modificación do convenio do ano 2020, para a xestión do proxecto Innovatrial. O obxectivo deste convenio é realizar a contratación precomercial de servizos de I+D para a realización dun proxecto integral que abrangue toda a xestión da información derivada da investigación clínica e impulse a súa conectividade coa actividade asistencial do sistema sanitario galego.
 
Sinalar que a contratación pública de innovación é un modelo no que Galicia conta cunha ampla experiencia e recoñecemento, como queda reflectido no recente I Premio Europeo nesta materia outorgado ao Sergas polo Consello Europeo de Innovación.
 
O equipo de traballo xa constituído por membros do CDTI, da Consellería de Sanidade, do Sergas, e da Axencia Galega de Coñecemento en Saúde (ACIS), continúa a traballar nos pregos de licitación, para que a súa convocatoria teña lugar no primeiro semestre deste ano.
 
Mellora da calidade de vida da cidadanía
A Consellería de Sanidade remarca que a investigación biomédica e en ciencias da saúde é un dos piares do Sistema Nacional de Saúde, como elemento clave para mellorar a calidade e a expectativa de vida da cidadanía. A situación da pandemia derivada da covid puxo de manifesto, a nivel global, a importancia da investigación e o seu achegamento á sociedade. Ademais, a investigación no eido da sanidade tamén funciona como motor económico, xa que é xeradora de emprego e de novos avances científicos e tecnolóxicos que permiten o crecemento e desenvolvemento industrial do territorio.
 
A busca de solucións innovadoras e integrais para mellorar a xestión da investigación e a súa interconexión coa actividade asistencial é unha necesidade pública detectada polo sistema sanitario galego. A disposición da comunidade autónoma galega para a súa resolución xa quedara plasmada na modificación da Lei 8/2008, de 10 de xullo, de Saúde de Galicia, engadindo unha disposición adicional única na que se recolle a posta en marcha dun Sistema integrado de información da investigación clínica do Sistema Público de Saúde de Galicia.

 

EnviarImprimirPDF
FacebookTwitterMeneame
Xunta de Galicia © Xunta de Galicia. Información mantida e publicada en internet pola Consellería de Sanidade - Servizo Galego de Saúde