Preto da metade do orzamento destínase ao Capítulo I, isto é, ao pagamento das nóminas do persoal, máis de 7.500 traballadores da área, tanto dos centros de saúde como dos hospitais. Este capítulo abrangue o 46% do total, 371 millóns de euros.

Ao Capitulo II, bens e servizos, dedícanse 286 millóns de euros, un 35%. Neste epígrafe contabilízanse os gastos de farmacia de dispensación hospitalaria, material e instrumental sanitario, implantes ou laboratorios.

50 millóns de investimentos

Ademais, a Xunta de Galicia prevé realizar uns investimentos de 50 millóns de euros na sanidade pública coruñesa. Destes, 38 millóns irán dirixidos ao Complexo Hospitalario Universitario da Coruña e 12 millóns á Atención Primaria.

O investimento no Hospital Universitario A Coruña ascenderá a 28 millóns de euros para rematar as obras da Fase 0 e comezar a Fase 1 do novo CHUAC, ademais de 450.000 euros para iniciar a reforma da área de urxencias do Hospital de Cee, que se licitará antes de que remate o ano.

A estas infraestruturas hai que engadirlle os recursos consignados para completar os pagos dos contratos licitados ao longo do 2022, a través dos fondos europeos Next Generation, e que supoñen un investimento de 8,5 millóns de euros para adquirir equipos de alta tecnoloxía. Así, vanse renovar 4 TAC´s, por un importe de 2,7 millóns de euros; 1 RNM, por un importe de 1,4 millóns; 1 equipo de radioloxía vascular intervencionista, por 871.000 euros; outro de neuroloxía vascular, por 1,2 millóns de euros; e 2 salas de hemodinámica por un valor de 1,9 millóns de euros.

Os orzamentos tamén contemplan unha partida de máis de 400.000 euros para a renovación dun TAC no Hospital Público Virxe da Xunqueira de Cee.

 12 millóns para Atención Primaria

No referido á Atención Primaria, dos preto de 12 millóns de euros que se investirán nas obras de construción e reformas de centros de saúde na Área Sanitaria da Coruña e Cee, están reservados 2,2 millóns de euros para o inicio da obra do novo centro de saúde de Abegondo, que se licitará antes de rematar o ano. Ademais de 6,6 millóns para a construción de novos centros de saúde e preto de 1,5 millóns para reformas, ampliacións e melloras dos mesmos, como os 100.000 euros para o inicio da obra de reforma do centro de saúde de Curtis.

Asemade, os Orzamentos tamén recollen unha partida de 500.000 euros para licitar os proxectos de novos centros de saúde contemplados no Plan de Infraestruturas de Atención Primaria cando os Concellos correspondentes acheguen ao Sergas unha parcela axeitada, como poderían ser os centros de Carballo, Fisterra ou Malpica.

Unha das partidas máis destacable, cunha asignación dun 1 millón de euros, é para financiar o novo centro de saúde de Santa Lucía, que figura no capítulo VII de transferencias de capital, pois será unha transferencia ao Concello da Coruña, encargado de licitar proxecto e obra segundo o convenio asinado.

 Entidades de Atención Sociosanitaria

O proxecto de Orzamentos da Xunta de Galicia para 2023 reserva máis de 10 millóns de euros dentro das contas do Sergas para transferencias a entidades de atención sociosanitaria, de saúde mental e de atención ás adiccións.

Parte destes fondos destínanse a entidades de eido autonómico ou para convocatorias de axudas de carácter competitivo, pero tamén hai consignadas partidas específicas para convenios nominativos con entidades de eido local.

No caso da Área Sanitaria da Coruña e Cee as asociacións beneficiadas por estes fondos, que acadan  máis de 2 millóns de euros, son a Asociación Cidadá de Loita contra a Droga (ACLAD), 1,8 millóns de euros; a Asociación Ex-Alcohólicos A Coruña, 227.000 euros; a Asociación Antonio Noche López, preto de 30.000 euros e a Asociación Vieiro de Carballo, algo máis de 7.000 euros