Un investimento
da Xunta de Galicia de 1.121.716,81 euros permitirá modernizar todos os
quirófanos do Hospital Universitario de Ourense, con 23 novas mesas de
operacións móbiles e de altas prestacións, no marco dunha licitación deste
equipamento destinado aos hospitais de Ourense, Vigo, Santiago e A Coruña que
ven de ser adxudicado a Getinge Group Spain S.L.U.
Do orzamento
global de 3 millóns de euros, a maior partida é a destinada ao Hospital
Universitario, onde se instalarán 4 mesas de prestacións avanzadas e 19 mesas
móbiles. Estas últimas do modelo Getinge Maquet Meera, por un valor de
755.483,36€. Contan con desprazamento lonxitudinal motorizado, o que permite
unha radiotransparencia case ilimitada, para a realización de probas
radiolóxicas intraoperatorias, cunhas características que garanten a máxima
confortabilidade e seguridade tanto para os pacientes como para o persoal.
A nova mesa de
operacións recibiu o prestixioso galardón iF Design Award polo seu deseño, xa que
a súa flexibilidade de posicionamento e inclinación facilita o seu uso en todas
as disciplinas cirúrxicas, con maior confort para os pacientes e os
profesionais. Asemade, contan cun maior número de seccións e de articulacións
motorizadas; maior rango de altura e ángulo de inclinación; así como unha maior
anchura do taboleiro e grosor do colchón.
Tamén inclúen un
sistema de sensores, que evita colisións durante os movementos dentro do
quirófano; un sistema de auto nivelación e un sistema de iluminación de
seguridade baixo a mesa, que alerta do estado da mesma, se está freada ou non.
Abundando na seguridade, as superficies e a cuberta da base son de aceiro
inoxidable e planas para facilitar a limpeza e a desinfección.
Mesas de altas
prestacións 100% radiotransparentes
Ás catro mesas cirúrxicas
de altas prestacións, modelo Getinge Maquet Otesus destínase un orzamento de
366.233,46€. Son mesas de operacións modulares, cunha ampla variedade
accesorios, para que o persoal cirúrxico poda adaptar a composición a cada
paciente ou intervención, e que polas súas características adicaranse a cirurxía
vascular, neurocirurxía, traumatoloxía e cirurxía xeral e do aparello
dixestivo.
As novas mesas
de operacións avanzadas inclúen unha columna fixa, con control manual e unha
amplísima variedade de posicionamentos, mediante un mando de control intelixente,
intuitivo de fácil manexo, mellorando a seguridade dos pacientes, cunha
capacidade e estabilidade de ata 250 quilogramos en posición invertida.
Igualmente, este
sistema conta con taboleiros que permiten unha fácil transferencia do paciente,
para evitar a repetición de desprazamentos e garantir a súa seguridade e a dos
profesionais en todo o procedemento. Igualmente gran parte das súas pezas e
accesorios son lavables directamente nas máquinas esterilizadoras.
Con base de
fibra de carbono, son 100% radiotransparentes, permitindo obter imaxes radiolóxicas
de precisión en todos os ángulos. Igualmente son totalmente flexibles para unha
gran variedade de procedementos, cun posicionamento óptimo para cirurxías de
columna e vasculares.
Modernización de
quirófanos
Este
investimento súmase a recente adquisición de lámparas de quirófano, que se
están a instalar neste intre nas tres áreas cirúrxicas dos hospitais de
Ourense, Verín e Valdeorras. En concreto son 26 equipos nos que a Xunta de
Galicia investiu tamén en Ourense a maior partida por Áreas Sanitarias: 589.875
euros, o 42% dun orzamento de 1,4.millóns de euros.
Esta nova adxudicación
na mellora da dotación técnolóxica e de equipamento dos centros sanitarios
públicos de Galicia é susceptible de finanzamento ao 100% pola Unión Europea no
marco do eixo REACT UE do programa operativo FEDER 2014-2020 como parte da
resposta da UE a pandemia Covid-19.