O Consello da Xunta autorizou hoxe a aceptación da cesión do terreo feita de xeito gratuíto por parte do Concello de Boborás que permitirá a construción dun novo centro de saúde no municipio.

A execución desta infraestrutura sanitaria é froito do acordo de colaboración asinado entre a Consellería de Sanidade e o Concello de Boborás en marzo deste ano para dar unha mellor resposta aos problemas de saúde da poboación mediante actuacións que permiten mellorar as dotacións e infraestruturas adicadas á atención asistencial á cidadanía no Concello ourensán.

A construción deste novo centro de saúde estaba prevista na fase 1 do Plan de Infraestruturas Sanitarias de Atención Primaria aprobado polo Consello da Xunta o 29 de outubro de 2021. Froito desa planificación o concello, coa axuda da Deputación de Ourense, procedeu a expropiar as parcelas necesarias. A nova infraestrutura construirase nunha parcela de 6.247 metros cadrados situada no Concello de Boborás, na denominación Cotiño.

En desenvolvemento do convenio, o pasado 21 de xullo, a Consellería de Sanidade asinou a encomenda á Axencia Galega de Infraestruturas para a xestión das actuacións en relación coa redacción do proxecto e a execución das obras de construción do novo centro de saúde de Boborás (Ourense).

Dado o avanzado dos trámites por parte do Concello e só á espera deste acordo de cesión, a Xunta, a través da Axencia Galega de Infraestruturas, avanzou na licitación o pasado 29 de novembro, por importe de 90.857 euros, da redacción do proxecto básico e de execución e dirección de obra do novo centro de saúde de Boborás.

Una vez adxudicado e asinado o contrato, a empresa adxudicataria disporá dun prazo de 3 meses para entregar o proxecto básico e de 2 meses para presentar o proxecto de execución, unha vez que o proxecto básico sexa informado favorablemente.

O orzamento estimado para a execución das obras do novo centro de saúde de Boborás estímase en 1,24 M€, un investimento da Xunta que quedará determinado finalmente no proxecto de execución.

A Deputación de Ourense achegará 186.000 euros para a urbanización dos terreos do novo centro de saúde, orzamento que inclúe un aparcadoiro con 70 prazas, unha parada de autobús, a construción de beirarrúas e a instalación de colectores para a xestión de residuos.

O propio Concello está a urbanizar esta parcela, dotándoa de servizos urbanísticos e beirarrúas e incorporando, tamén, na súa parte traseira, unha zona de estacionamento que servirá ao conxunto de equipamentos que se están a construír neste ámbito. Prevese, polo tanto, unha superficie de 2.100 m2 aproximadamente na súa fronte para a localización do centro de saúde do municipio ourensá.

Incremento nun 40% da superficie actual

De acordo co programa funcional e de espazos, o centro de saúde incrementará en case un 40% a superficie actual. Máis en concreto, o novo centro acadará unha superficie construída de 663,60 m² e unha superficie útil de 592,50 m2.

A área de asistencia sanitaria contará con 2 consultas de medicina xeral, 2 de enfermaría, zona de espera e 1 sala da muller con aseo propio.

Contarase cun área de respiratorios, con sala polivalente e sala de espera independente, e un área asistencia polivalente adicional.

O novo centro de saúde disporá dun espazo cuberto para a ambulancia, vestíbulo, recepción con zona de espera e un despacho para atención ao usuario. O resto da superficie será para administración, servizos e instalacións.