​O Consello da Xunta autorizou na súa reunión de hoxe o segundo acordo de prórroga do convenio de colaboración entre o Servizo Galego de Saúde e a Asociación de Enfermos de Ril (ALCER), asinado o 15 de decembro do ano 2020, que garante a cobertura do servizo de traslado de pacientes aos centros de hemodiálise na provincia de Lugo.

O propósito do convenio, que se prorroga ata o 14 de decembro de 2023, é simplificar as prestacións por desprazamento das persoas desta provincia afectadas por insuficiencia renal crónica que reciben tratamento de hemodiálise. O importe anual da subvención da prorroga deste convenio é de 672.880 euros.

O labor de ALCER é mellorar as condicións de vida do colectivo de enfermos de Ril na provincia de Lugo e, entre outras actividades, encárgase de xestionar o traslado dos pacientes aos centros sanitarios para recibir tratamento de hemodiálise.

Deste xeito, os pacientes que teñen que acudir a diferentes centros distribuídos pola provincia luguesa para seren tratados con hemodiálise, son trasladados en taxi ou, se a súa condición clínica así o require, en ambulancia.

O servizo traslada a unha media mensual de 158 pacientes, realizando 56 rutas e unha media de 76.000 quilómetros cada 30 días.