​

O conselleiro de Sanidade, Julio García Comesaña, acompañado do delegado territorial da Xunta en Pontevedra, Luis López Diéguez, e do xerente da área sanitaria, José Flores Arias, reuniuse con representantes municipais da comarca de Pontevedra, para falar da situación da atención primaria. Neste encontro, o titular da carteira sanitaria do Executivo galego trasladoulles o balance realizado nos últimos meses, así como as melloras acadadas, dentro da difícil situación que está a vivir a atención primaria en todo o Estado polo déficit de persoal especialista en medicina familiar e comunitaria que se sufre en todo o Estado.

Na xuntanza, o conselleiro explicou que a Xunta ten reforzado o sistema sanitario aumentando o número de prazas en primaria e hospitalaria, e incrementando os presupostos e recursos, polo que a poboación galega pode estar tranquila, xa que ten unha atención sanitaria de calidade.

O Executivo galego traballa para mellorar esa atención a todos os ámbitos, incorporando os profesionais que sexa posible, sexan enfermeiras, farmacéuticos, traballadores sociais ou especialistas de calquera ámbito, -dixo o titular sanitario na reunión-.

Os datos facilitados polo conselleiro na xuntanza cos alcaldes foron o incremento do cadro de persoal que houbo nesta área sanitaria. Así, nos últimos cinco anos traballan nela 265 persoas máis. Tamén detallou todas as medidas que está a tomar a Xunta para facer fronte a este déficit de médicos, entre as que sinalou as melloras retributivas aos profesionais ou o aumento da prazas MIR, e destacou, tamén, o incremento do presuposto e dos recursos destinados pola Xunta ao primeiro nivel asistencial.

Na reunión, Comesaña dixo que o Goberno galego seguirá a reclamar ao Ministerio de Sanidade que asuma a súa competencia, que é regular onde se pode formar aos médicos, e que mude os criterios de formación.​