As obras de ampliación e mellora do
Hospital de Verín continúan a bo ritmo, coa instalación na cuberta de parte dos
650 paneis fotovoltaicos previstos, que tamén se situarán no novo edificio de
urxencias, como parte da mellora de eficiencia enerxética, que se
complementa co illamento térmico das terrazas.
En paralelo, avanzan os traballos de construción do novo edificio,
de 1.488 metros cadrados, co hormigonado da cimentación desta ampla e moderna
extensión, que quedará unida ao hospital para acoller aos servizos de
urxencias, tanto hospitalarias como de atención primaria, gañando en
accesibilidade e funcionalidade, aumentando ademais o espazo dispoñible para a
atención sanitaria deste distrito sanitario.
Nas obras, que se desenvolven cun prazo de once meses, a Xunta
de Galicia invirte 3.9 millóns de euros que permitirán ademais de ampliar o
espazo dispoñible para asistencia, integrar o centro na estratexia do Servizo
Galego de Saúde cara á mellor optimización enerxética, na liña de
sustentabilidade e coxeneración con fontes alternativas ao combustible fósil, iniciativa
na que Galicia está a ser un referente a nivel europeo.
A continuidade dos traballos previstos pola empresa adxudicataria, Elecnor
Servizos e Proxectos SAU, é rematar nos vindeiros días a cimentación para
comezar coa planchada, en paralelo, continuarase traballando na renovación do
illamento da cuberta, previamente a instalar os paneis, asi como da nova
enfriadora.
Accesible e práctico
Grazas a súa configuración, de planta baixa e conectado ao resto do
hospital, o novo edificio mellorará a accesibilidade das urxencias da poboación
da bisbarra, centralizadas desde anos no hospital tanto o Punto de Atención
Continuada (PAC) atendido polo persoal de Atención Primaria, e o Servizo de
Urxencias, polos profesionais do hospital comarcal.
O novo edificio esta proxectado especificamente para acollelos o que
permitirá mellorar a súa funcionalidade e coordinación, cunha distribución á medida
da súa actividade, xerando distintos circuítos
para a atención dos pacientes. Ademais, o seu deseño inclúe, por vez primeira
nun area de urxencias, un dobre circuíto para a atención aos pacientes con sospeita
de infección respiratoria.
Unha das principais vantaxes da ampliación, mediante a construción
dun novo edificio axunto, é que as obras
non están a afectar á actividade diaria, xa que non foi preciso trasladar
provisionalmente ningún servizo, ou acometer obras de adaptación, habituais nas
reformas hospitalarias, xa que só se procederá ao traslado dos servizos unha
vez rematado.
Outra das vantaxes é que o novo edificio de Urxencias disporá dun
acceso exclusivo, a nivel de planta baixa, cunha área de parada de vehículos,
para recoller ou achegar pacientes, e estacionamento propio.
Distribución práctica
Na entrada situarase a Admisión e o Triaxe,
para facilitar a atención do paciente no PAC ou Urxencias. O PAC terá dúas
consultas médicas e unha de enfermería, comunicadas e próximas ao acceso, e unha
consulta de atención a sospeitas de infección respiratoria, con sala de espera
con aseo exclusivos.
Pola súa parte o Servizo de Urxencias contará
con dúas consultas polivalentes, unha sala de curas e seis boxes. Deles, un de
maiores dimensións para a atención a pacientes críticos e outro, con aseo e espazo
previo, para facilitar o illamento de pacientes con sospeita de infección.
O novo edificio hospitalario contará tamén
cunha sala de observación 24 horas, sala de traballo médico, sala de reunións,
farmacia, sala de pre-alta, despacho de información a familiares, dormitorios
de persoal e outros espazos de apoio. Asemade, a área de persoal estará
separada da zona de atención a pacientes, cun acceso rápido aos puntos de atención.