O Diario Oficial de Galicia publica, na súa edición de hoxe, o decreto da oferta de emprego público para a provisión de postos de difícil cobertura de determinado persoal estatutario do Sergas con título de especialista en Ciencias da Saúde para este ano. Esta oferta parcial é de 423 prazas, do total das 1.630 que ofertará o sistema sanitario público galego no 2023 correspondente á taxa de reposición ordinaria.
En total, vanse convocar 116 prazas para persoal facultativo de distintas especialidades dos hospitais comarcais de Cee, Barbanza, A Mariña, Monforte de Lemos, Verín, O Barco de Valdeorras e O Salnés. Ademais, reforzarase o cadro de persoal de atención primaria con 72 prazas de médico de familia e outras 60 de pediatras para centros de saúde. Así mesmo, vanse ofertar outras 175 prazas na área de Saúde Mental, para levar a cabo o desenvolvemento das distintas medidas do Plan de saúde mental de Galicia poscovid-19: 81 para facultativo especialista de área en Psiquiatría e Psicoloxía Clínica, e outras 94 de enfermeiro especialista de Saúde Mental.
Por áreas sanitarias, a da Coruña e Cee, contará con 3 médicos de primaria máis, 12 pediatras de atención primaria, 8 prazas para o seu hospital comarcal, e 35 profesionais para a área de saúde mental.
Na área de Ferrol, son 8 prazas de médico de primaria máis, 3 de pediatría, e 14 para saúde mental.
Na de Santiago e Barbanza, 15 de médicos de primaria máis, ademais de 9 pediatras de primaria, 13 para profesionais do hospital de Barbanza, e 29 para saúde mental.
Na área de Lugo, A Mariña e Monforte de Lemos, son 11 prazas máis de médico de familia, e 9 pediatras. Ademais, os hospitais da Mariña e de Monforte reforzarán o seu cadro de persoal con 41 novos profesionais. Esta área tamén terá 18 novos profesionais especialistas de saúde mental.
A área sanitaria de Ourense, Verín e O Barco de Valdeorras reforzará os seus centros de saúde con 23 novos médicos de familia e 5 pediatras máis. No caso dos hospitais de Valdeorras e o de Verín, as prazas son 39. E no ámbito da saúde mental, as prazas para esta área serán 20.
A área sanitaria de Vigo terá, en atención primaria, 8 novos médicos de familia máis e 15 pediatras. No ámbito da saúde mental, as prazas son 39.
Na área sanitaria de Pontevedra e O Salnés, a súa atención primaria contará con 4 novos médicos de familia e 7 pediatras máis. No caso do Hospital do Salnés, reforzarase con 15 novos profesionais. No ámbito da saúde mental, as prazas para esta área son 20.
A oferta de 423 prazas publicada hoxe enmárcanse na Lei 2/2022, do 6 de outubro, de medidas extraordinarias dirixidas a impulsar a provisión de postos de difícil cobertura. Esta normativa, establece medidas extraordinarias e temporais en materia de emprego público dirixidas a garantir a adecuada atención sanitaria de toda a poboación galega, dando continuidade ás medidas extraordinarias de fortalecemento da atención primaria iniciadas no ano 2021. Ademais, por primeira vez, establece un réxime extraordinario de acceso a postos de difícil cobertura de determinado persoal estatutario con título de especialista en ciencias da saúde do Sergas, por concurso de méritos, sen examen.
Hospitais comarcais, primaria e saúde mental
Co obxecto de dar unha resposta adecuada ás necesidades organizativas actuais, e coa finalidade de garantir a continuidade asistencial e a calidade, eficacia e eficiencia dos servizos e, xunto ao anterior, para promover a estabilidade dos recursos humanos, tendo en conta as dificultades excepcionais relacionadas coa escaseza de profesionais, a oferta hoxe publicada pola Xunta permitirá, así mesmo, convocar procesos selectivos específicos polo sistema de concurso, co fin de impulsar a incorporación urxente, estable e permanente de persoal aos postos de difícil cobertura dos seguintes colectivos e ámbitos:
Hospitais comarcais:
- Persoal facultativo de distintas especialidades dos hospitais dos distritos sanitarios de Cee, Barbanza, A Mariña, Monforte de Lemos, Verín, O Barco de Valdeorras e O Salnés.
Atención Primaria
- Persoal facultativo especialista de atención primaria e pediatra deste primeiro nivel asistencial.
Saúde Mental
- Persoal facultativo especialista de área en Psiquiatría e Psicoloxía Clínica e enfermeiro especialista de Saúde Mental, necesario para o desenvolvemento das distintas medidas do Plan de saúde mental de Galicia poscovid-19.
O sistema selectivo será o de concurso-de méritos e respectará os principios de libre concorrencia, igualdade, mérito e capacidade.
Do total de prazas, reservaranse 22 para o acceso a persoas con discapacidade xeral, así como as correspondentes para a súa provisión polo sistema de promoción interna.
Remarcar que previamente a Xunta xa ofertou, por este sistema, 106 prazas de persoal facultativo especialista de atención primaria para postos de difícil cobertura, permitindo cubrir ámbitos asistenciais que estaban vacantes.