O CHUAC, en colaboración coa Fundación Stanpa, pon en
marcha os talleres do programa “Ponte guapa, sentiraste mellor” coa celebración
do segundo taller en liña para pacientes do centro sanitario.
O
programa ten como obxectivo proporcionar ás persoas con cancro, en tratamento nos
hospitais de día de oncoloxía e onco-hematoloxía, unha atención integral,
complementando a asistencia sanitaria con iniciativas que consigan o mellor
beneficio terapéutico abordando o impacto da enfermidade na imaxe persoal e
social, proporcionando axuda no coidado persoal como parte do plan de coidados
terapéuticos.
O programa “Ponte guapa, sentiraste mellor” e a súa
crecente presenza é un reflexo do compromiso entre a Fundación Stanpa e os
centros hospitalarios implicados polo coidado e benestar dos pacientes
oncolóxicos que, a través da aprendizaxe de técnicas para coidar a súa pel e
maquillarse, conseguirán diminuír ou evitar algúns efectos secundarios dos
tratamentos sobre a pel e recuperar o seu aspecto natural para mellorar a súa
autoestima.
Durante os talleres, esteticistas e maquilladoras
profesionais voluntarias ensinan aos pacientes para coidar a súa pel e a
maquillarse durante o tratamento. Neles,
os profesionais utilizan produtos doados por máis de 30 empresas fabricantes de
cosméticos, patróns e colaboradores da Fundación, que compoñen un neceser de
cosméticos de limpeza, tratamento e maquillaxe, entregado gratuitamente a cada
participante. O programa é gratuíto, non médico e neutro respecto a as marcas e
produtos utilizados sen finalidade promocional nin publicitaria.
Como novidade, púxose en marcha unha nova iniciativa,
Fundación Stanpa Men, co obxectivo de chegar aos pacientes masculinos
ofrecéndolles sesións de formación específicas sobre o coidado da pel durante o
tratamento oncolóxico, que terán lugar en todos os centros hospitalarios
adscritos ao Programa. Tomando as rendas da súa propia imaxe, os pacientes séntense
mellor e teñen unha actitude máis positiva ante a enfermidade. Ademais, estas
sesións son unha excelente forma para aprender e compartir experiencias.