Santiago de
Compostela, 22 de xuño de 2023.- Médicos residentes do servizo de anatomía patolóxica da Área
Sanitaria de Santiago de Compostela e Barbanza participaron nun estudo
internacional que ven de ser publicado na revista The Lancet no que se analizaba un posible aumento na agresividade
dos tumores tiroideos tras a pandemia de COVID-19. Así, nesta recente publicación
con colaboración de Kelly Vargas Osorio e Jaime Reuto Castelo, residentes patólogos do Hospital Clínico
Universitario de Santiago de Compostela demostrou que a pandemia de COVID-19 é
responsable dun aumento de tumores da glándula tiroides máis agresivos.
O estudo, publicado no número de xuño da prestixiosa revista
médica Lancet Diabetes Endocrinology,
recolle a experiencia de máis de 87.000 pacientes de 157 hospitais e 59 países
antes, durante e despois da pandemia (xaneiro do 2019 ata decembro de 2021),
que foran diagnosticados citolóxicamente con nódulos tiroideos
“indeterminados”.
A experiencia recollida a nivel mundial, incluíndo a achega
galega, demostrou que o atraso na intervención destes nódulos debido ás
prioridades establecidas durante a pandemia deu lugar a tumores de maior tamaño
e con maior número de metástase no momento da cirurxía.
No estudo tamén colaborou o doutor José Manuel Cameselle,
facultativo especialista do Hospital Clínico Universitario e titor dos médicos
residentes. De acordo cos datos recolleitos a nivel mundial, os autores deste
artigo concluíron que “a cirurxía por nódulos tiroideos ‘indeterminados’ non
debería ser atrasada en futuras situacións de pandemia” segundo destacan.