A directora xeral de
Planificación e Reforma Sanitaria da Consellería de Sanidade, Sofía López
Linares, visitou esta mañá o Centro de Saúde de Sada, onde mantivo unha reunión
de traballo cos seus responsables, para avaliar e recibir as súas achegas sobre
o desenvolvemento dos Plans de Saúde Local implantados nos servizos de Atención
Primaria.
Os Plan locais de saúde son
instrumentos vivos, abertos e participativos que facilitan o desenvolvemento
dun novo modelo de atención primaria, con vocación pola comunidade, na que se
prima a integración do Centro de Saúde no tecido social, coñecendo ás asociacións
de veciños, ás farmacias comunitarias, aos colexios e ás residencias
sociosanitarias, ademais dos servizos dispoñibles nos barrios e os concellos
para, entre todos crear sinerxias de protección e coidado da saúde.
A directora destacou o intenso papel
na promoción da saúde comunitaria das e dos profesionais de Atención Primaria
da Área da Coruña e Cee e subliñou o valor dos plans de saúde para “servir de
guía tanto na planificación de medios e, moi especialmente, potenciar o valor
do equipo, destacando fortalezas, como a de potenciar o papel da primaria como
referentes do coidado e seguemento dos pacientes crónicos”.
Ao encontro
mantido no Centro de Saúde de Sada esta mañá coa xefa de servizo, Concepción
Garrido Villarino, coa coordinadora de enfermería, Mª Jesús García Rodríguez, e
co responsable de farmacia, Rafael Ramos Montes, asistiu tamén a directora de
Atención Primaria da Área Sanitaria da Coruña e Cee, Concepción Blanco Sánchez.
Análise
dos Servizos de Atención Primaria
Segundo sinalou
a directora xeral, os Plans Locais de Saúde son o mellor
reflexo da saúde dos veciños de cada
territorio, “así como a mellor guía
para planificar toda acción que poida mellorar a calidade
de vida da súa poboación de referencia”.
Cada Plan
inclúe un conxunto de accións, definidas por parte dos responsables dos
servizos de atención primaria. Ademais, cada Área Sanitaria adquire un
compromiso para facilitar o logro dos obxectivos propostos. Xunto a elo os
resultados obtidos e as accións de mellora son obxecto de seguimento e medición
periódica.