O Consello da Xunta autorizou hoxe a contratación do servizo de transporte sanitario urxente terrestre nas áreas da Coruña, Baixo Miño, Pontevedra, O Salnés e Vigo pola Fundación Pública Urxencias Sanitarias de Galicia-061 cun valor estimado de 48.977.831,21 € que se distribuirá en dúas anualidades, correspondentes ao período comprendido entre os meses de xuño de 2024 e maio de 2026. A entrada en vigor do contrato, que está prevista para o día 1 de xuño de 2024, terá unha duración de dous anos, que poderá prorrogarse por un período máximo dun ano.
A licitación do contrato do servizo de transporte sanitario urxente terrestre para a Comunidade Autónoma de Galicia realizouse no mes de decembro, sen que se recibiran ofertas para os citados lotes. Deste xeito, a Xunta de Galicia trata de axilizar a contratación deste servizo esencial á maior brevidade para seguir a cumprir co seu compromiso coa eficacia, eficiencia e calidade desta actividade sanitaria asistencial cara á poboación galega.
Cómpre salientar que o contrato para a prestación do servizo de transporte sanitario urxente terrestre incorpora importantes melloras laborais para o colectivo de técnicos en emerxencias sanitarias, que supera os 1.000 traballadores na Comunidade Autónoma galega.
Estes beneficios están relacionados co reaxuste dos tempos de traballo, que supón unha redución da xornada laboral; a compensación das xornadas nocturnas con días de descanso; incrementos salariais; e melloras en beneficios sociais, como a protección da maternidade e as condicións de acceso á xubilación, entre outros. Aspectos, todos eles, recollidos no actual convenio do sector de transporte de persoas enfermas e accidentadas en ambulancia de Galicia, asinado no mes de novembro do pasado ano.
Ampliación de vehículos substitutos
Ademais, os pregos do contrato para a prestación deste servizo inclúen unha ampliación dos vehículos substitutos de soporte vital avanzado (SVA), nas áreas de transporte sanitario urxente con tres ou máis vehículos de SVA, e cun vehículos substituto de soporte vital básico (SVB), nas áreas con oito ou máis vehículos de SVB.
Por outra banda, entre as melloras cualitativas deste contrato, destacan a incorporación dun sistema de incentivos da operatividade dos recursos e a oferta, nos criterios de adxudicación, dun vehículo adicional para o traslado de pacientes con obesidade mórbida que garante o traslados destes pacientes cun maior confort e seguridade.
Aumento de cobertura e capacidade
Con este contrato, a Rede de transporte sanitario urxente terrestre de Galicia-061 disporá de 12 ambulancias asistenciais de soporte vital avanzado medicalizadas, 5 ambulancias asistenciais de SVA de enfermería, dous helicópteros medicalizados, 107 ambulancias asistenciais de soporte vital básico e tres ambulancias convencionais.
Todos estes recursos, mobilizados desde a Central de Coordinación do 061, garanten a asistencia ás urxencias e ás emerxencias extrahospitalarias en Galicia as 24 horas do día, os 365 días do ano.