Máis de 200 especialistas vanse dar cita na 30 edición das Xornadas Internacionais de Coloproctoloxía “Enrique Casal”, que organiza o servi,zo de Cirurxía Xeral e Dixestiva do Complexo Hospitalario Universitario de Vigo (CHUVI) e máis concretamente a Unidade de Coloproctoloxía. O evento terá lugar en Baiona desde o 6 ao 8 de marzo.
A presidenta do comité organizador da xornada é a doutora Raquel Sanchez, xefa do servizo, mentres que os coordinadores son os doutores Enrique Moncada, Vizenzo Vigorita e Alberto de San Ildefonso.
Segundo afirma o doutor Moncada “as Xornadas deste ano son moi significativas, xa que celebramos a 30 edición deste encontro científico. Esta continuidade avala a calidade e o nivel das mesmas, que ano a ano reúne aos mellores especialistas internacionais, xerando unha gran expectación e converténdose xa en referencia nacional no ámbito da actualización de coñecementos e formación das patoloxías colorrectais”.
O programa científico a desenvolver consta de varios módulos con mesas redondas e conferencias nas que se abordarán estas patoloxías desde varios ámbitos. Pódense subliñar as últimas novidades en cirurxía robótica; o manexo conservador do cancro de recto; a revisión crítica de novas tecnoloxías en proctoloxía; a neoplasia anal intraepitelial; ou a formación de líderes en cirurxía colorrectal, entre outros.
300 cirurxías anuais de cancro colorrectal
A Unidade de Coloproctoloxía do complexo hospitalario vigués, que depende do Servizo de Cirurxía Xeral e Dixestivo, conta con 13 facultativos especialistas e realiza cirurxías tanto no Hospital Álvaro Cunqueiro como no Meixoeiro, dependendo da complexidade de cada unha delas.
No Hospital do Meixoeiro lévanse a cabo cirurxías ambulatorias ou de curta estancia postoperatoria, mentres que no Álvaro Cunqueiro realízanse as máis complexas, a maioría delas oncolóxicas.
Nestes momentos realízanse máis de 300 cirurxías de cancro colorrectal anuais, “unha cifra das máis altas a nivel nacional en relación co volume de casos atendidos”, asegura o Dr. Moncada.
Neste senso, desde hai tres anos ten incorporada á súa carteira de servizos a cirurxía robótica, rexistrando xa preto de 450 intervencións co robot da Vinci.
Esta unidade cumpre os máis altos estándares de calidade, o que lle valeu a reacreditación en nivel avanzado pola Sociedad Española de Coloprotologia. Esto a converte nun referente nacional nas patoloxías de colon, recto e ano.