Anatomía patolóxica da xerencia compostelá, única en Galicia en contar coa técnica de secuenciación masiva de nova xeración para o estudo do cancro de pulmón
EnviarImprimirPDF
FacebookTwitterMeneameTuenti
Sistema de lectura automática do Sergas Lectura automática
» Axuda
.
23 11 2018

Santiago, 23 novembro de 2018.- O Hospital Clínico de Santiago acolle hoxe a Reunión Galega da Sociedade Española de Anatomía Patolóxica. Trátase do encontro anual que organiza o grupo galego nos diferentes hospitais do SERGAS para actualizar coñecementos e debater sobre as novidades diagnósticas e terapéuticas na súa especialidade, e que foi inaugurado pola xerente de xestión integrada de Santiago, Eloína Núñez.

Este ano o tema central do encontro que reúne a uns 40 patólogos galegos, é a patoloxía pulmonar ou torácica e conta con dous conferenciantes de gran prestixio, José Ramírez Ruz do Hospital Clinic de Barcelona, experto en patoloxía intersticial pulmonar, cardíaca e patoloxía torácica, e Federico Rojo Todo, Xefe de Servizo Anatomía Patolóxica da Fundación Jiménez Díaz, un dos profesionais con máis experiencia en patoloxía molecular de España.


O servizo de Anatomía Patolóxica da Xerencia de Xestión Integrada de Santiago, dirixido por José Antúnez, é o único galego en contar con cunha nova técnica de Secuenciación Masiva de Nova Xeración (NGS) para o estudo de cancro de pulmón non microcítico en estadío avanzado, o máis habitual.

O laboratorio de bioloxía molecular, pertencente ao servizo de Anatomía Patológica de Santiago, foi dos primeiros en España e o único na sanidade pública galega en empregar esta técnica para a análise do cancro de pulmón na asistencia diaria, proporcionando aos oncólogos a información máis completa para o tratamento do paciente. A nova técnica precisou dun investimento en tecnoloxía duns 200.000 euros. No futuro, prevese a súa aplicación noutros tipos de cancro como mama ou colon.

Esta tecnoloxía permite a detección simultánea de múltiples alteracións en xenes relacionados co cancro nun único test, que pode ser realizado nun tempo reducido e cun custo relativamente baixo. Estes estudos permiten obter un mellor coñecemento da patoxénese do cancro, mellorar o diagnóstico e predicir resistencias farmacolóxicas.

O diagnóstico do cancro de pulmón obtense por unha análise histolóxica dunha mostra de tecido tomada do pulmón ou de localizacións metastásicas. Nos últimos tempos tense experimentado un cambio no coñecemento e manexo do cancro de pulmón, en gran medida grazas aos avances no estudo da bioloxía molecular destes tumores, que permitiron a identificación de distintos tipos de alteracións xenético-moleculares asociadas co seu desenvolvemento e a súa resposta aos fármacos.

Estanse convertendo en marcadores de utilidade para o diagnóstico e para o establecemento do prognóstico, así como en biomarcadores predictivos moi eficaces na elección das terapias. A selección do tratamento baseado en marcadores moleculares predictivos está a modificar substancialmente o enfoque clínico dos pacientes.

As ferramentas tradicionais para identificar estas alteracións moleculares presentan numerosas limitacións. A secuenciación masiva de nova xeración (NGS) constitúe un importante avance tecnolóxico na evolución das técnicas para o diagnóstico molecular.

O cancro de pulmón é o segundo tipo de cancro máis frecuente e é a principal causa de morte por cancro a nivel mundial. No servizo de Anatomía Patolóxica do CHUS, no que traballan máis de 50 profesionais (patólogos, técnicos e biólogos), diagnostícanse preto de 300 novos casos de cancro de pulmón ao ano.

O servizo de Anatomía Patolóxica realiza ao ano preto de 80.000 estudos de tecidos e células de pacientes, diagnosticando as enfermidades e poñéndolle nome e apelidos a enfermidades neoplásicas e non neoplásicas, para que os pacientes teñan o mellor tratamento posible por parte dos médicos doutras especialidades (cirurxiáns, dermatólogos, oncólogos, dixestólogos, nefrólogos, xinecólogos, etc).

O labor dos patólogos é crucial tamén na prevención secundaria (diagnóstico en estadíos iniciais ou preneoplásicos) en determinadas neoplasias tales como o cancro de colo do útero e do carcinoma colorrectal. Para iso emprega, ademais das clásicas técnicas morfolóxicas microscópicas, outras técnicas moleculares máis complexas que permiten identificar alteracións xenéticas en pacientes con cancro.

O servizo implementou a secuenciación masiva de nova xeración en pacientes con cancro de pulmón, o que permite realizar un diagnóstico máis preciso proporcionando aos oncólogos unha información máis completa para seleccionar o tratamento máis, así como o emprego de tratamentos personalizados.




 

Saúdos

 

EnviarImprimirPDF
FacebookTwitterMeneameTuenti
Xunta de Galicia
© Xunta de Galicia. Información mantida e publicada en internet pola Consellería de Sanidade - Servizo Galego de Saúde
Internet e ti | Contacte
rss