A XUNTA INCREMENTA NUN 11% O SEU APOIO AO PROGRAMA DE REHABILITACIÓN FISIOTERAPÉUTICA DA FEDERACIÓN GALEGA DE ENFERMIDADES RARAS E CRÓNICAS
01 07 2022
 

 

O conselleiro de Sanidade, Julio García Comesaña; e a presidenta da Federación Galega de Enfermidades Raras e Crónicas (FEGEREC), Francisca Luengo Milara; asinaron esta mañá un novo convenio de colaboración para o desenvolvemento do programa de actividades destinadas a mellorar a saúde e a calidade de vida das persoas afectadas por enfermidades raras e crónicas.
 
Así, e co ánimo de colaborar na prestación da atención fisioterapéutica ás persoas que padezan unha enfermidade rara ou estean pendentes de diagnóstico, o Servizo Galego de Saúde realizará unha achega de 32.803 euros. Neste senso, a partida económica engádese aos 16.000 euros cos que a Xunta apoiou á Federación, en xaneiro, ao abeiro da súa liña de apoio ás entidades privadas sen ánimo de lucro para a realización de programas de carácter sociosanitario. No seu conxunto, o programa de rehabilitación FEGEREC recibirá este ano un total de 48.803 euros, o que representa un incremento do 11% respecto do pasado ano.
 
No ano 2021, un total de 102 pacientes participaron neste programa no que se realizaron 5.151 actividades de rehabilitación fisioterapéutica. Ademais, e de acordo cos resultados achegados na memoria de actividade do 2021 por FEGEREC, o 66% dos pacientes aliviaron a súa dor grazas a este programa, e que, o 65% conseguiu acadar unha mellora da coordinación e do control postural.
 
No acto de sinatura, tamén estivo presente o Delegado territorial da Xunta na provincia da Coruña, Gonzalo Trenor López. Así, o acordo define o conxunto de obxectivos que debe acadar este programa. Nomeadamente, favorecer o acceso das persoas que padecen unha enfermidade rara á rehabilitación fisioterápica de forma sostible e a través de profesionais con coñecemento específico nestas doenzas; achegar información vencellada co ámbito da fisioterapia ás persoas que padecen este tipo de enfermidades -así como as súas familias- sobre a patoloxía e os seus síntomas e técnicas para o seu tratamento; ademais de actuar na prevención de problemáticas afins, como poden ser as alteracións circulatorias e tróficas, as complicacións respiratorias, ou as alteracións muscoesqueléticas e ortopédicas.
 
Na mesma liña, o programa debe contribuir a que as persoas afectadas logren, na medidas do posible, a máxima capacidade funcional e independencia nas actividades da vida diaria (AVD),  incrementando a súa calidade de vida e a das súas familias; manter e mellorar a calidade de vida do paciente; promover traballo integral cos diferentes profesionais que interveñen no tratamento e, por último, favorecer adhesión aos tratamentos.
 
A Federación Galega de Enfermidades Raras e Crónicas (FEGEREC), federación sen ánimo de lucro, aglutina asociacións que intentan dar resposta ás necesidades dos pacientes con ese tipo de enfermidades e máis ás súas familias dentro da nosa comunidade autónoma.
 
Na actualidade, e a pesar da súa baixa prevalencia, hai certo tipo de enfermidades que polas súas características específicas e singulares requiren dunha resposta máis completa e integral. Unha das características comúns dunha porcentaxe elevada de enfermidades raras é que na maioría dos casos existe unha diminución da capacidade física e funcional, susceptibles de ser tratadas mediante a fisioterapia.
 
Ao tratarse de enfermidades crónicas, estes síntomas prolónganse no tempo, podendo manterse ou aumentar e, xa que logo, precisan da actuación fisioterapéutica continuada para obter resultados visibles.
 
Premio a Estratexia Galega de Enfermidades Raras e novas unidades
A Xunta de Galicia continúa a implementar medidas para mellorar a atención dos galegos e galegas que padecen algunha destas patoloxías cualificada como raras, ao ter unha  prevalencia menor de cinco casos por 10.000 habitantes. Así, en xuño de 2021 o Executivo galego aprobou a Estratexia Galega en Enfermidades Raras, co obxectivo de establecer un novo modelo asistencial para este tipo de patoloxías, garantindo un prazo de diagnóstico máis reducido, menor variabilidade no seu manexo e unha xestión máis áxil, coordinada e eficiente.
 
Recentemente, a Estratexia Galega de Enfermidades Raras vén de ser premiada pola Plataforma de Organizacións de Pacientes (POP) como a mellor iniciativa que conta ou incorpora a participación dos pacientes nos procesos de definición, implantación e/ou avaliación de estratexias ou plans no ámbito das enfermidades crónicas, dentro do  Sistema Nacional de Saúde (SNS).
 
Ademasi, cómpre destacara que na mesma liña de atención ás enfermidades raras, o pasado mes de febreiro, o Executivo galego puxo en marcha senllas unidades funcionais multidisciplinares dedicadas a este tipo de doenzas, e que se emprazan en Vigo, A Coruña e Santiago.
 
Estas unidades son dispositivos asistenciais que se encargan das actividades que comprenden o diagnóstico e seguimento dos pacientes con enfermidades pouco frecuentes, e que, para elo, contan con equipos multidisplinares formados por: un especialista en medicina interna, un especialista en pediatría e un profesional de enfermería.
 

 

Xunta de Galicia © Xunta de Galicia. Información mantida e publicada en internet pola Consellería de Sanidade - Servizo Galego de Saúde