​Profesionais sanitarios do centro de saúde Fontenla Maristany de Ferrol, e preto dunha vintena de asociacións e entidades veciñais do Ensanche A-Inferniño que xa están constituídas como Rede Local de Saúde participan nunha xornada, Inferniño Saudable, que ten lugar hoxe, entre as 11:00 e as 13:00, no Centro Cultural Carvalho Calero en Ferrol. Esta xuntanza é a primeira actividade derivada da xa mencionada e recentemente creada Rede Local de Saúde do Ensanche A Inferniño. Falarán, en diversas mesas organizadas polos propios colectivos integrantes, de alimentación, de exercicio e dos beneficios de deixar de fumar. Haberá tamén xogos tradicionais en cada etapa da vida, dende a nenez ata a idade máis madura.

Así, teñen cabida neste encontro asociativo a nutrición, as adiccións ou a saúde bucodental. Un dos colectivos levará un esqueleto cos distintos órganos afectados  polo consumo do tabaco, e referiranse ó tabaquismo pasivo. O tabaquismo estará tamén presente nunha mesa específica organizada polas residentes do centro de saúde Fontenla Maristany, e que é continuidade da xa realizada onte por mor do día Mundial sen Tabaco. Hai tamén xogos tradicionais, cmo as chapas, a mariola, o aro, as canicas, o xogo da ra ou o dos fíos.

Acción Comunitaria

Este proxecto está organizado por profesionais de Enfermaría do centro de saúde da Área Sanitaria de Ferrol no marco de colaboración entre o Concello de Ferrol e a Consellería de Sanidade para a rotación das residentes. “O noso Barrio, A nosa Rede. Proxecto de Acción Comunitaria para a creación dunha Rede de Promoción da Saúde no Ensanche A-O Inferniño” era o xermolo deste proxecto, que estaba elaborado polas residentes de Enfermaría, Paula Souto, Laura López, Susana Verdía, Selene Lourido, Paz Caínzos e Graciela Villamil.

Lembrar que esta rede local implica que un profesional da saúde e un paciente identifican xuntos actividades da comunidade para mellorar a súa saúde e o seu benestar. O piar fundamental deste proxecto é a pretensión de impulsar a gobernanza local en saúde, descentralizando con iso o papel das e os profesionais sanitarios e cedendo o lugar protagonista á cidadanía, como sucede hoxe neste encontro no que xa os protagonistas son as asociacións que conforman a rede.

Funcionamento da Rede Local de Saúde

A modo de contexto, recordar que se produciu un primeiro contacto o pasado novembro co Concello, e máis de trinta encontros tanto individuais como colectivos cunha ducia de moi diversos colectivos, asociacións veciñais, e grupos étnicos e relixiosos que representen a diversidade cidadá deste barrio. Realizaron un mapa de activos, que son factores ou recursos que melloran as habilidades de persoas, grupos, comunidades, poboacións, sistemas sociais e/o institucións para manter e soster a saúde e o benestar, e axudar a reducir as desigualdades en saúde. Por exemplo, os recursos sociosanitarios relacionados coa saúde e o benestar que existen: centros onde facer exercicio, parques, actividades deportivas, etc... 

A motivación era conseguir que, coa divulgación da guía de activos, se acaden distintas intervencións que permitan poñer en práctica os resultados do estudo, así como lograr unha adecuada sensibilización a nivel dos centros sanitarios acerca da importancia da prescrición social de activos en saúde. De novo, esta xornada de hoxe, Inferniño Saudable, é un exemplo desa materialización.

Ás xa citadas xuntanzas con diversos colectivos do barrio para detectar as necesidades, amezas e fortalezas da saúde do barrio, engadiron, o traballo dun mapa das emocións, tanto cos máis novos nos institutos e colexios, como coa poboación xeral, plantexándolles cuestións tales como que lles xera ou produce benestar e o que non do seu barrio. Así, visitaron centros educativos e, tamén, acudiron á praza más concorrida do barrio e preguntaron á poboación en xeral que pensan do barrio, que botan en falta, e que problemática ven, entre outras cuestións. Isto é, aplicaron xa ata o momento no proxecto diversas metodoloxías e técnicas de investigación: documentais, entrevistas en profundidade individuais, observación directa, grupos de discusión nos que se puña en contacto a moi diferentes colectivos, técnicas específicas de participación comunitaria como o mapeo emocional, a liña do tempo, o mapeo artístico e a fotovoz.