A XUNTA PREVÉ ADXUDICAR A VINDEIRA SEMANA O SERVIZO DE TRANSPORTE SANITARIO URXENTE NA ÁREA DE VIGO
16 05 2024
 

A secretaría xeral técnica da Consellería de Sanidade,  Natalia Lobato Mosquera, avanzou esta mañá que a Xunta prevé adxudicar a vindeira semana o servizo de transporte urxente na área de Vigo, contratado polo procedemento de emerxencia.

En resposta a unha pregunta na Comisión 5ª de Sanidade do Parlamento de Galicia, Lobato explicou o conxunto de medidas que o departamento sanitario da Xunta e a Fundación Pública Urxencias Sanitarias 061, están a poñer en marcha para garantir o servizo de transporte sanitario na área de Vigo, así como os dereitos dos seus traballadores.

Dun xeito paralelo, abundou Lobato, o pasado luns, 13 de maio, a Fundación 061 deu conta no Consello da Xunta da contratación pola vía da emerxencia do servizo do transporte sanitario urxente na área de Vigo, un expediente que se estenderá durante o tempo estritamente necesario, namentres se tramita un novo procedemento de contratación aberto.

No tocante ao transporte sanitario non urxente, lembrou que se atopa xa en proceso de contratación.

Respecto das condicións laborais dos traballadores, Natalia Lobato puxo en valor que os novos contratos que licitaron, tanto a Fundación Pública Urxencias Sanitarias 061 (responsable do transporte urxente), como as diferentes áreas sanitarias (responsable do transporte non urxente), xa incorporan as melloras derivadas do novo convenio colectivo do sector.

Na súa intervención, explicou que a Consellería de Sanidade e a Fundación 061 realizan un seguimento permanente do funcionamento do servizo de transporte sanitario na área de Vigo, que atende as necesidades das máis de 339.000 persoas que integran esta área sanitaria. 

Así, destacou que se realizan inspeccións ordinarias e extraordinarias e cando se detectan incidencias se aplican as correspondentes penalidades.

A secretaría xeral técnica tamén apuntou que, ante o coñecemento do atraso no pago das nóminas do mes de marzo, e as denuncias presentadas ante a Inspección de Traballo, o pasado mes de abril iniciouse o procedemento de intervención deste servizo, destacando que, na actualidade, os traballadores xa percibiron a nómina.

Xunta de Galicia
© Xunta de Galicia. Información mantida e publicada en internet pola Consellería de Sanidade - Servizo Galego de Saúde